काठमाडौं,१० असार । क्रान्तिकारी कम्युनिष्ट पार्टीका कार्यबाहक महासचिव सिपी गजुरेलले एक बक्तब्य प्रकाशित गरी अमेरिका र इजरायली हस्तक्षेप र सैन्य आक्रमणको निन्दा गर्नुभएको छ । उहाँले बक्तब्यमा इरानको राष्ट्रिय स्वाधीनतामाथि अमेरिकी साम्राज्यवाद र त्यसको पिछलग्गु इजरायलद्वारा गरिएको ठाडो हस्तक्षेप र सैन्य आक्रमणको कडा शब्दमा विरोध गर्नुभएको छ । वक्तव्यमा त्यस प्रकारको हस्तक्षेपका विरुद्ध प्रतिरोध गरिरहेका इरानी जनताप्रति ऐक्यबद्धता जाहेरगर्दै विश्वभरिका न्यायप्रेमी जनसमुदायलाई अमेरिकी साम्राज्यवादको विरोध र इरानी जनताको पक्षमा उभिन सशक्त आह्वान गरिएको छ । पाँच बुँदामा जारी वक्तव्यमा भनिएको छ ः
१. इजरायलद्वारा इरानले आणविक कार्यक्रम संचालन गरेको आरोपमा सैन्य हस्तक्षेप गरेर इरानका उच्चपदस्थ सैनिक नेतृत्व एवम् आणविक वैज्ञानिकहरुको हत्या, आणविक केन्द्रहरुमाथि आक्रमण र त्यसकोलगत्तै अमेरिकाले इरानका तीनवटा आणविक केन्द्रहरुमा बंकर बस्टर बमहरु प्रयोगगरी थप घातक आक्रमण गरेको कार्यप्रति हाम्रो पार्टीको गम्भीर ध्यानाकर्षण भएको छ ।
२. अमेरिकी साम्राज्यवाद र त्यसको संरक्षकत्वमा रहेको इजराली विस्तारवादले वर्तमान इरानी सत्ताबाट उनीहरुको अस्तित्वमाथि खतरा आइलाग्ने भएकाले इरानलाई आणविक हतियारद्वारा लेस शक्ति सम्पन्न राष्ट्र बन्न दिननहुने कुतर्कगरी इरानका विरुद्ध त्यस प्रकारका आक्रमणहरु गर्नुपरेको बताउँदै आएकोमा अहिले आएर अमेरिका र इजरायलले इरानको वर्तमान सत्ता संरचनालाई कुनै पनि हालतमा बदल्नुपर्ने र त्यसको बदला उनीहरुको हितमा काम गर्ने नयाँ सत्ताको स्थापना गर्नुपर्ने वकालत गरेका छन् ।
३. हाम्रो पार्टीले इरानमा कस्तो प्रकारको शासन व्यवस्था कायमगर्ने भन्ने सार्वभौम अधिकार इरानी जनतामा निहित हुने भएकोले अमेरिकी साम्राज्यवाद र इजरायली विस्तारवादद्वारा इरानमाथि गरिएको सत्ता परिवर्तन सम्बन्धी हस्तक्षेप र बर्बर सैन्य आक्रमणको हदैसम्म निन्दा एवं भत्र्सना गर्दछ र इरानले आफ्नो आत्मरक्षा गर्न पाउने अधिकारको समर्थन गर्दछ ।
४. हाम्रो पार्टीले अमेरिकी साम्राज्यवाद तथा इजरायलद्वारा इरानमाथि भइरहेको अन्धाधुन्द आक्रमण तत्काल रोक्न माग गर्दछ र विश्वलाई नरसंहारकारी तेश्रो विश्वयुद्धतर्फ धकेल्ने अमेरिकी गतिविधिको तीव्र विरोध गर्दछ ।
५. हाम्रो पार्टीले अमेरिकी साम्राज्यवाद र त्यसको पिछलग्गु इजरायलद्वारा इरानको राष्ट्रिय स्वाधिनतामाथि गरिएको ठाडो हस्तक्षेपको कडा शब्दमा विरोध गर्दछ र त्यस प्रकारको हस्तक्षेपका विरुद्ध प्रतिरोध गरिरहेका इरानी जनताप्रति ऐक्यबद्धता जाहेर गर्दछ । साथै, विश्वभरिका न्यायप्रेमी जनसमुदायलाई अमेरिकी साम्राज्यवादको विरोध र इरानी जनताको पक्षमा उभिन सशक्त आह्वान गर्दछ ।
यसैबीच भोलि असार ११ का दिन नौंवाम दलहरुले संयुक्तरुपमा साम्राज्यवादी युद्ध विरुद्ध अन्तरक्रिया कार्यक्रमगर्ने भएका छन् । भोली दिउँसो १२ बजे राष्ट्रिय नाच घर जमलमा इरानमाथी अमेरिका तथा इजरायलद्वारा गरिएको आक्रमणको बिरोधमा नौ राजनीतिक दलहरुको संयुक्त आयोजनामा बिचार गोष्ठि हुने भएको हो । अन्तरक्रिया कार्यक्रममा कार्यक्रममा नेकपा (मसाल), राष्ट्रिय जनमोर्चा, माओवादी केन्द्र, नेपाल कम्युनिष्ट पार्टी, एकीकृत समाजवादी, क्रान्तिकारी कम्युनिष्ट पार्टी नेपाल, वैज्ञानिक समाजवादी कम्युनिष्ट पार्टी नेपाल, नेकपा (बहुमत), नेकपाका शिर्ष नेतृत्वहरुले बोल्ने कार्यक्रम छ ।
