काठमाडौं, १२ मंसिर । एमाले आशन्न ११ औँ राष्ट्रिय महाधिवेशनको तयारीमा होमिएको थाहाभएको छ । यसैक्रममा प्रतिनिधि चयनका लागि बिभिन्न जिल्लास्तरमा निर्वाचन प्रक्रिया शुरुभएको छ । महाधिवेशनका लागि देशभर एकैदिन भोली मंसिर १३ गते प्रतिनिधि चयन गरिसक्नुपर्ने भएकाले सोका लागि मतदाता नामावली प्रकाशन र उम्मेदवारी दिने प्रक्रिया शुरुभएको हो । कतिपय जिल्लामा सर्वसम्मति र निर्विरोधरुपमा प्रतिनिधि चयन भएको छ । पार्टीका स्थायी कमिटी सदस्य एवं संगठन विभागका प्रमुख काशीनाथ अधिकारीले प्रतिनिधि चयनको निर्वाचन प्रक्रियामा प्रवेश गर्नुभन्दा पहिला सम्बन्धित निर्वाचन क्षेत्रको अन्तिम मतदाता सूची अनिवार्य रुपमा प्रकाशन गर्नुपर्ने निर्देशनबमोजिम काम भइरहेको बताउनुभएको छ । कायम भएको अन्तिम मतदाता सूची (नवीकृत पार्टी सदस्यता सूची) को संख्या केन्द्रीय संगठन विभागलाई तत्काल जानकारी गराउन पनि विभागले निर्देशन दिएको थियो ।
त्यस्ैगरी आज मंसिर १२ गते भरे साँझसम्म सर्वसहमतिका लागि अन्तिम प्रयासगर्ने र सो नभएमा मंसिर १३ गते निर्वाचन प्रक्रियामा गएर प्रतिनिधि छनोटगर्न एमालेले निर्देशन दिएको छ । छनोट भएका प्रतिनिधिको नाम यही मंसिर १५ गतेभित्र विभागमा बुझाइसक्नुपर्नेछ । यही मंसिर २७ देखि २९ गतेसम्म काठमाडौंमा हुने एमालेको महाधिवेशनमा आयोजक, निर्वाचन क्षेत्रीय कमिटी (खुला), जनसंगठन, युवा, दलित, महिला, प्रवास क्षेत्रबाट गरी करिब दुई हजार २०० प्रतिनिधि सहभागी हँुदैछन् । यसैबीच एमालेले प्रधानमन्त्री सुशीला कार्कीसमक्ष प्रतिनिधिसभा विघटनविरुद्ध सर्वाेच्च अदालतमा परेको रिट विचाराधिन रहेको र मुलुकमा निर्वाचनका वातावरण सुनिश्चित नरहेको विषयमा आफ्नो धारणा प्रस्तुत गरेको छ । प्रधानमन्त्री निवास बालुवाटारमा हिजो भएको छलफलमा एमालेका महासचिव शंकर पोखरेल, उपमहासचिव प्रदीपकुमार ज्ञवालीलगायत नेताले सरकार गठन र संसद विघटनबारे संवैधानिक परीक्षण हुनुपर्ने र निर्वाचनको निष्पक्षताबारेमा ढुक्क हुनुपर्ने विषय राख्नुभएको छ । छलफलमा सहभागी एमालेका निवर्तमान प्रमुख सचेतक महेश बर्ताैलाले देशमा भइरहेका बिभिन्न घटनाले पनि निर्वाचनको वातावरण बनिनसकेको प्रधानमन्त्रीलाई स्मरण गराइएको बताउनुभयो ।
एमालेले आफूहरु निर्वाचनबाट डराएर भाग्ने पक्षमा भने नरहेको पनि स्पष्ट गरेको छ । सर्वाेच्च अदालतमा एमालेका तर्फबाट र अन्य अधिवक्ताहरुका तर्फबाट परेका रिट विचाराधीन रहेको छ भने आगामी फागुन २१ गते प्रतिनिधिसभाको निर्वाचन गराउन सरकार र निर्वाचन आयोग जुटिसकेको छ । निर्वाचनको तयारीलाई घनिभूत बनाउन प्रमुख दलसँग संवाद बढाउने क्रममा आज प्रधानमन्त्री कार्कीले एमालेका नेतहरुलाई बोलाउनुभएको थियो । सो अवसरमा प्रधानमन्त्री कार्कीले निर्वाचनको विश्वसनीयतामा शंका नगर्न आग्रहगर्दै जेनजी आन्दोलनको मूलमर्म नै नयाँ जनादेश रहेकाले चुनावमा केन्द्रित हुनु सबैको दायित्व भएकामा जोड दिनुभएको उहाँको सचिवालयले जनाएको छ । एमालेले सेवानिवृत्त भएलगत्तै निवर्तमान प्रहरी महानिरीक्षक चन्द्रकुवेर खापुङलाई स्थान हद तोकिनु, फरार कैदी पक्राउ नपर्नु र लुटिएका सबै हतियार फिर्ता नहुनुजस्ता घटनाले पनि निर्वाचनको वातावरणमा प्रश्न उठेको जनाएको थियो ।
