तस्वीर रासस
काठमाडौं,१४ मंसिर । प्रधानमन्त्री सुशीला कार्कीलाई राष्ट्रिय प्रजातन्त्र पार्टीले बिभिन्न पाँचवटा मागसहित ज्ञापनपत्र बुझाएको छ । प्रधानमन्त्रीसँग भेटगरी अध्यक्ष राजेन्द्र लिङ्देन नेतत्वमा ज्ञापनपत्र बुझाइएको हो । उक्त टोलीमा वरिष्ठ उपाध्यक्ष विक्रम पाण्डे, वरिष्ठ उपाध्यक्ष रोशन कार्की, वरिष्ठ उपाध्यक्ष रवीन्द्र मिश्र, उपाध्यक्ष हेमजंग गुरुङ, महामन्त्री डा धवलशमशेर राणा, महामन्त्री कुन्ती शाही, महामन्त्री राजेन्द्र गुरुङ र महामन्त्री शरद्राज पाठकलगायत सहभागी हुनुहुन्थ्यो । राप्रपाले आगामी निर्वाचन अगावै मुलुकको वर्तमान समस्याको दीर्घकालीन र स्थायी समाधानका लागि भविष्यमा कसैले आन्दोलन गर्नुनपर्ने परिस्थिति निर्माणको माग गरेको छ ।
त्यसका लागि राजनीतिक दल र जेनजीलगायत पक्षधर सम्मिलित सर्वपक्षीय सम्मेलनको आयोजनाबाट देशलाई निकास दिने काम गर्नुपर्ने र अब हुने आमनिर्वाचनमै अन्तरजिल्ला र विदेशबाट मतदानगर्न पाउने सुनिश्चिततागर्न सम्भव रहेको र त्यसलाई सुनिश्चित गरेरमात्रै निर्वाचन प्रक्रियालाई अगाडि बढाउनुपर्ने माग गरेको छ । जेनजी प्रदर्शनमा सहभागी भएकै कारण प्रदर्शनका सहभागीलाई पक्रने, मुद्धा लगाउनेजस्ता काम भइरहेकाले यस्ता कार्य तत्काल रोक्नुपर्ने, प्रदर्शनकाक्रममा भएका शहीद भएकाहरुका परिवार र घाइतेका माग अविलम्ब पूरागर्न, सरकारसँग बिभिन्न माग लिएर प्रदर्शनमा रहेका र प्रधानमन्त्रीसँग भेटगर्न चाहेकाहरुलाई उपेक्षागर्न नहुने र वार्ता तथा संवादबाट वातावरणलाई शान्त बनाउने प्रयासगर्न ज्ञापनपत्रमार्फत माग गरिएकको छ ।
