तस्वीर रासस
काठमाडौं,१४ मंसिर । आज पोखरामा नेपाली कम्युनिष्ट पार्टीको एकता सन्देश सभा हुँदैछभने १५ वटा समूहका नेताहरुको जमघट हुने भएको छ । सभामा पूर्ब माओवादी नेता तथा सो पार्टीका संयोजक पुष्पकमल दाहाल र सहसंयोजक माधवकुमार नेपाललगायतका नेताहरुले सम्बोधन गर्ने कार्यक्रम छ । नेकपाले भोली सोमबार कोशीको विराटनगरमा, आगामी १८ गते, कर्णालीको सुर्खेतमा, २० गते जनकपुरमा र २३ गते बागमतीको हेटौँडामा सभा गर्ने बताइएको छ । अन्त्यमा आगामी २९ गते देशभरका पालिकाहरुमा एकता सन्देश सभा हुने नेकपाले जनाएको छ । सो पार्टीले हिजो शनिबार लुम्बिनी प्रदेशको दाङ देउखुरी र शुक्रबार सुदूरपश्चिमको धनगढीमा एकता सन्देश सभा गरिसकेको छ । यसैबीच नेकपाले एक अपिल जारीगर्दै विद्यमान राष्ट्रिय परिस्थिति, आवश्यकता र जनअपेक्षालाई दृष्टिगतगर्दै पुनःगठित नेपाली कम्युनिष्ट पार्टीको नेतृत्वमा शुरु भएकाले ध्रुवीकरण अभियानमा समाहित हुन आह्वान गरेको हो ।
श्रमजीवी वर्गको मुक्तिको वैचारिक अस्त्र माक्र्सवाद–लेनिनवाद भएकाले पार्टीको मार्गनिर्देशक सिद्धान्त पनि सोही भएको उल्लेखगर्दै नेकपाले सही विचार, राजनीतिक कार्यक्रम, सबैखाले अनुभव र ऊर्जाको संकेन्द्रण पार्टी एकताको सार भएको जनाएको छ । उक्त अपिलमा नेपाली पूँजीवादी जनवादी क्रान्तिका मौलिक विशेषता र नेपाली समाजको विशिष्टताका आधारमा तयार गरिएको नेपाली विशेषताको समाजवाद पार्टीको रणनीतिक कार्यक्रम हो । यही मार्गनिर्देशक सिद्धान्त र कार्यक्रमको आधारमा सुशासन, सामाजिक न्याय र समृद्धिको माध्यमहुँदै समाजवादको दिशामा अघिबढ्ने संकल्प हाम्रो एकताका मुख्य आधार हुन् भनिएको छ।
गणतन्त्र र राष्ट्रिय स्वाधिनताको रक्षा तथा सुशासन, सामाजिक न्याय र आर्थिक सामाजिक रुपान्तरणगर्दै समाजवादी क्रान्तिको लक्ष्य पूरागर्ने अभिभाराका साथ बिभिन्न १५ कम्युनिष्टसहित समाजवादी पार्टीबीचको एकीकरणबाट नेपाली कम्युनिष्ट पार्टी निर्माण गरिएको अपिलमा उल्लेख गरिएको छ ।
