काठमाडौं,१४ मंसिर । प्रगतिशील लोकतान्त्रिक पार्टीले देशभर भ्रष्टाचार विरोधी अभियान सञ्चालनगर्ने निर्णय गरेको छ । प्रलोपाको विस्तारित बैठकले जिएस गुरुङको नेतृत्वमा कार्यदल बनाउने निर्णय गरेको हो । अध्यक्ष परिषद्का अध्यक्ष दुर्गा सोबले प्रेस विज्ञप्तिमार्फत विस्तारित बैठकले कार्यदलका सदस्यहरु जटिल कार्की, अमित खनाल ऊर्जा, सम्झना राई, ध्रुवप्रसाद काप्री, मञ्जु मिक्चान र दीपक महतो रहने गरी कार्यदल बनाउने निर्णय गरेको जानकारी दिनुभउको छ । विज्ञप्तिमा राष्ट्रिय स्वाधीनता, लोकतान्त्रिक गणतन्त्रको पक्षमा तथा भ्रष्टाचार र विभेदविरुद्ध एकजुट हुन सम्पूर्ण प्रगतिशील, लोकतान्त्रिक र वामपन्थी शक्तिलाई आह्वान गर्दछौँ । साथै, तोकिएको समयमा निर्वाचन गराउनका लागि वातावरण बनाउन सम्बन्धित सबै पक्षलाई आग्रहगर्दै पार्टीले बृहत् एकीकरण, ध्रुवीकरण र सहकार्यका लागि वार्तागर्ने पनि निर्णय गरेको छ भनिएको छ ।
गत साता आइतबार नेपाल समाजवादी पार्टी (नयाँ शक्ति)का संयोजक डा.बाबुराम भट्टराई, पूर्ब माओवादी नेताहरु जनार्दन शर्मा, राम कार्की, सुदन किराँती, सन्तोष परियारलगायत नेताहरुको सक्रियतामा प्रगतिशील लोकतान्त्रिक पार्टीको घोषणा गरिएको थियो । प्रलोपाको अध्यक्ष परिषद्को विस्तारित बैठकले केन्द्रीय समितिको प्रथम पूर्णबैठक आगामी २५–२६ गते सम्पन्नगर्ने, विधान निर्माण, केन्द्रीय समितिको आकार र विभागहरु नामकाजी नभएर कामकाजी बनाउने, निर्वाचन क्षेत्रमा खट्ने सक्रिय युवालाई प्रत्येक निर्वाचन क्षेत्रबाट केन्द्रीय समितिमा समेट्नेगरी प्राथमिकता दिने, केन्द्रीय आयोग, केन्द्रीय विभागका प्रमुख, उपप्रमुख र प्रदेश अध्यक्ष परिषद्सम्म पदेन केन्द्रीय समितिको भूमिकामा रहने व्यवस्थासहित प्रस्ताव गर्ने निर्णय गरेको अध्यक्ष परिषद्का अध्यक्ष सोबले जानकारी दिनुभएको छ ।
