काठमाडौं, १३ मंसिर । तीनबर्षमा तीनपटक म्याद थप्दापनि बाग्लुङको स्वास्थ्य चौकी भवन अधुरै रहेको छ । एकबर्षभित्र सक्नेगरी निर्माण थालिएको नारायणस्थान स्वास्थ्य चौकीको भवन तीनबर्ष बित्दासमेत सम्पन्न हुनसकेको छैन । साँघुरो भवनबाट सेवा प्रवाहगर्दै आएको बागलुङ नगरपालिका–१४ स्थित नारायणस्थान स्वास्थ्य चौकीको भवन कहिले सम्पन्न हुन्छभन्ने अझै टुंगोे लाग्न सकेको छैन । निर्माण व्यवसायीको लापरवाही र ढिलासुस्तकीका कारण तीनबर्ष बित्दासमेत भवन निर्माण अधुरै छ । अहिले उक्त भवन ढलान र पर्खालको काममात्रै सकिएको छ । संघीय सरकारको विशेष अनुदानमा निर्माण थालिएको भवन अझै सम्पन्न नभएको बागलुङ नगरपालिकाले जनाएको छ । ०७९ माघ छगते एक बर्षमा सक्नेगरी निर्माण थालेको भवन अझै सम्पन्न हुननसकेको बागलुङ नगरपालिकाका इन्जिनियर सोबिन घर्तीले जानकारी दिनुभएको छ ।
उहाँकाअनुसार दुईपटक थपेको म्यादसमेत अहिले सकिएकाले भवन निर्माणमा अझै अन्योलता छाएको छ । घर्तीले एकबर्षमा सकिने भवन तीनबर्षमा सकिएको छैन, दुईपटकसम्म थपेको म्यादसमेत कात्तिक मसान्तमा सकिएको छ, भवनमा प्लाष्टरको काम अझै सकिएको छैन, तिहार यता कामदार भवनमा देखिएका छैनन् । भवन समयमा नबन्दा ठेक्का तोड्ने वा म्याद थप्ने विषयमा छलफल भइरहेको छ, नगरपालिकाले निर्माण व्यवसायीलाई धरौटी जफत गरेर भएपनि सम्पन्नगर्ने योजनामा छ भन्नुभएको छ । भवन निर्माणका लागि दोश्रोपटक थपगरिएको म्यादसमेत कात्तिक मसान्तमा सकिएको छ । निर्माण व्यवसायी डिएनप्रसाद जेभीसँग एक करोड ८२ लाखमा ठेक्का सम्झौता भएको थियो । निर्माण व्यवसायीले थोरै कामदार परिचालनगर्ने, सम्पर्कबिहिन हुने लगायतका कारण भवन समयमै बन्ननसकेको हो । नगरपालिकाकै नमूना स्वास्थ्य चौकीकारुपमा रहेको नारायणस्थान स्वास्थ्य चौकी अहिले साँघुरो भवनबाट सेवा प्रभाह भइरहेको स्वास्थ्य चौकीका प्रमुख ऋषिराम शर्माले जानकारी दिनुभएको छ । भवन सम्पन्न भए गुणस्तरीय सेवा प्रवाहगर्न सहज हुने उहाँको भनाइ थियो ।
