तस्वीर रासस
काठमाडौं, १३ मंसिर । नेपाली कम्युनिष्ट पार्टीका संयोजक पुष्पकमल दाहालले राष्ट्रमा उत्पन्न संकट समाधानका लागि वामपन्थी र गैरवामपन्थी शक्तिलाई एउटैमोर्चामा ल्याउन जरुरीरहेको बताउनुभएको छ । नेपाली कम्युनिष्ट पार्टीको धनगढीबाट शुरु गरिएको पार्टी एकता सन्देश सभामा दाहालले नेकपा पार्टीमा अन्य वामपन्थी र देशभक्तहरु केन्द्रित भएर अटाउन सक्ने बताउनुभएको हो । गत भदौ २३ र २४ गतेको घटनापछिको परिस्थिति समाधानका लागि वामपन्थी प्रगतिशील, लोकतान्त्रिक शक्तिलाई नेपाली कम्युनिष्ट पार्टीको मोर्चामा ल्याउन पहल भइरहेको जानकारी दिनुभएको थियो । हिजो भए÷गरेका कमीकमजोरीको समीक्षागरी नेकपाको निर्माण शुरुगरिएको बताउँदै उहाँले नेकपाले कोरेको गोरेटो बाटोमा देश अघिबढ्दै छ, नेपालको एक नम्बर पार्टी नेकपा भइ छाड्छ भन्नुभयो । देशभरका क्रान्तिकारीले नेकपालाई नयाँ आशा र भरोसाका साथ हेरिरहेको उल्लेख गर्नुहुँदै उहाँले बृहत शक्ति निर्माणका लागि पार्टीमा ध्रुविकृत हुन सबैलाई अपिल गर्नुभएको थियो । हाल उत्पन्न संकटको निकाशका लागि निर्वाचनको विकल्प नदेखिएकाले निर्वाचनको वातावरण बनाउने काममा लाग्न नेता कार्यकर्तालाई उहाँले निर्देशन दिनुभएको थियो ।
त्यसैगरी पार्टीका सहसंयोजक माधवकुमार नेपालले वामपन्थी पार्टीहरुमा विगतमा भएका टुटफुटबाट शिक्षा लिएर नेपाली राजनीतिलाई स्वच्छ बनाउँदै नेकपा अघि बढ्नलागेको बताउनुभएको थियो । समाज रुपान्तरणका लागि पार्टीमा समाहित भएर अगाडि बढ्नमा सहयोगगर्न आग्रहगर्दै उहाँले नयाँ क्रान्तिकारी पार्टी बनाउने सोचले गठन भएको नेकपाले भ्रष्टाचार र बेथितिको अन्त्य र जनताको पक्षमा काम गर्ने सङ्कल्प लिएको छ भन्नुभएको थियो । सोही पार्टीका नेता भीमबहादुर रावलले देशको मुहार फेर्न गठन भएको नेकपाले देशलाई रुपान्तरण र परिवर्तनगर्न चाहेको बताउनुभएको थियो । उहाँले देशको स्वाधिनता र समृद्धिको यात्रालाई अगाडि बढाउन पार्टी क्रियाशील रहेको उल्लेख गर्नुभयो । सन्देश सभामा पार्टीका नेता प्रकाश शाह, गिरीराजमणि पोखरेल, भानुभक्त जोशीलगायतले पार्टी गठन र समसामयिक राजनीतिकाबारेमा बोल्नुभएको थियो । झण्डै एक दर्जनभन्दा बढी वाम घटक मिलेर गठन गरिएको भनिएको नेपाली कम्युनिष्ट पार्टीले पार्टी एकता सन्देश पहिलोपटक सुदूरपश्चिम प्रदेशको धनगढीबाट शुरुगरेको हो ।
