काठमाडौं, १५ माघ । नेपाल उद्योग वाणिज्य महासंघका केन्द्रीय अध्यक्ष चन्द्रप्रसाद ढकालले राजनीतिक दलले तयारगर्ने घोषणापत्रमा निजी क्षेत्रका एजेण्डालाई प्राथमिकता दिनुपर्नेमा जोड दिनुभएको छ । स्याङजाको वालिङमा वालिङ उद्योग वाणिज्य संघले हिजो आयोजना गरेको नवौँ वालिङ महोत्सवको उद्घाटन समारोहलाई सम्बोधनगर्दै उहाँले निजी क्षेत्रका एजेण्डालाई सबै राजनीतिक दलले घोषणापत्रमा राखेर कार्यान्वयन गरेको खण्डमा छोटो समयमा नै देशले सफलता प्राप्तगर्ने दाबी गर्नुभयो । उहाँले निजी क्षेत्रले देशको विकास र समृद्धिका लागि तयार गरेका एजेण्डालाई राजनीतिक दलले तयार पार्ने घोषणापत्रमा समावेशगरी कार्यान्वयन गरेको खण्डमा देशले छोटो समयमै समृद्धि हाशिल गर्छभन्ने हाम्रो बुझाई हो ।
देशमै उत्पादनसित जोडिने किसिमका कार्यक्रम तथा उद्योग सञ्चालन गरी उत्पादित सामग्री बाहिर निर्यात गरेर आम्दानी लिन सकिने प्रशस्त सम्भावना छन् भन्नुभएको थियो । हिजोदेखि शुरुभएको नवौँ वालिङ महोत्सव २५ गतेसम्म सञ्चालन हुनेछ । महोत्सवको तीन लाख दर्शकले अवलोकन गर्ने र झण्डै १० करोडको आर्थिक कारोबार हुने अपेक्षा रहेको वालिङ उद्योग वाणिज्य संघका अध्यक्ष एवं मेला मूल आयोजक समितिका संयोजक चेतनारायण श्रेष्ठले बताउनुभएको छ ।
