काठमाडौं,३ जेठ । नेपाली कांग्रेसका पूर्वकार्यवाहक सभापति पूर्णबहादुर खड्काले नेपाली कांग्रेस इतिहासकै प्रतिकूल अवस्थामा रहेको बताउनुभएको छ । नेपाली कांग्रेस कर्णाली प्रदेश कार्यसमितिले सुर्खेतको वीरेन्द्रनगरमा हिजो आयोजना गरेको कार्यक्रममा उहाँले पार्टी छिन्नभिन्न अवस्थामा रहेकाले पार्टीलाई एकताबद्ध र मजबुत बनाउने उद्देश्य आफूहरु क्रियाशील रहेको बताउनुभउको थियो । पूर्वकार्यवाहक सभापति खड्काले पार्टी विभाजनको अवस्थामा गएको भन्दै यसलाई रोक्न पार्टी नेता र कार्यकर्ता गम्भीर हुनुपर्नेमा जोड दिनुभएको थियो । उहाँले सभापति गगनकुमार थापालाई सिङ्गो कांग्रेसको सभापति भएर नेतृत्वगर्न आग्रह गर्नुभएको थियो ।
खड्काले घेराबन्दी र गुटबन्दीबाट जोगिएर सही नेतृत्वगर्नु आजको आवश्यकता रहेको धारणा राख्नुभएको थियो । उहाँले कांग्रेसमा समस्या आउँदा देशलेनै समस्या भोग्नुपरेको स्मरण गर्दै हाल देखिएका समस्या समाधान गरेर पार्टीलाई बलियो बनाउनुपर्नेमा जोड दिनुभएको थियो । कांग्रेस नेता जीवनबहादुर शाहीले पार्टीलाई बलियो बनाउन जिम्मेवार भूमिका खेल्न सबैलाई आग्रह गर्नुभएको थियो ।
