काठमाडौं, १४ कातिक । नेपालको मधेश प्रदेशबाट हराएका १६ बालबालिकाको भारतबाट उद्धार गरिएको थाहा भएको छ । उनीहरुलाई उद्धारगरी हिजो जनकपुरधाममा परिवारको जिम्मा लगाइएको थियो । मधेस प्रदेशका बिभिन्न जिल्लाबाट भारतको मुम्बई, दिल्ली र बिहार राज्यका विभिन्न ठाउँ पुर्याइएका ती बालबालिकालाई भारतीय प्रहरीको सहयोगमा कीन इन्डिया संस्थाले उद्धार गरेर मधेस प्रदेशका खेलकुद तथा समाज कल्याण मन्त्रालयका निमित्त सचिव रञ्जित यादवको रोहवरमा उनीहरुका अभिभावकको जिम्मा लगाएको हो ।
उद्धार गरिएकामा महोत्तरी, धनुषा, सिरहा, रौतहट र सप्तरी जिल्लाका रहेका छन् । उनीहरुको उमेर नौ देखि २२ वर्षसम्मको रहेको राष्ट्रिय बालअधिकार परिषद् मधेस प्रदेश समन्वय अधिकृत सञ्जीव महतोले जानकारी दिनुभएको छ । त्यस्तै दुई बालिकालाई पनि किन इन्डियाले भारतीय प्रहरीको सहयोगमा उद्धार गरेर बालकल्याण समिति तथा बालबालिका खोज उद्धार केन्द्र जनकपुरधाममार्फत अभिभावकको जिम्मा लगाएको बताइएको छ ।
