काठमाडौं,४ मंसिर । मानव अधिकार तथा शान्ति समाजले ०८२ को श्रष्टा सम्मान पुरस्कार सातजना महिला श्रष्टासहित सात प्रदेशका नौ भाषाका ११ जना श्रष्टाहरुलाई पुरस्कार प्रदान गरेको छ । हिजो आयोजित कार्यक्रममा डा गोपाल ठाकुरलाई महाप्रसाद रिजाल लोकतन्त्र श्रष्टा सम्मान, लक्ष्मी मालीलाई राधादेवी दाहाल सद्भाव श्रष्टा सम्मान, भागिरथी श्रेष्ठलाई ज्ञानप्रसाद खनाल सहिष्णुता सम्मान, रामबहादुर थापा मगरलाई भूमिप्रसाद बराल श्रष्टा सौगात, वागदेवी राईलाई जोगमाया बराल श्रष्टा सौगात, पञ्चकुमारी परियारलाई श्रीप्रसाद दाहाल श्रष्टा सौगात, शर्मिलाकुमारी चौधरीलाई पद्यप्रसाद दाहाल श्रष्टा सौगात, माधव चौलागाईलाई राधादेवी दाहाल श्रष्टा सौगात, गौरी तमुलाई जनककुमारी रेग्मी श्रष्टा सौगात पुरस्कार प्रदान गरिएको थियो । त्यसैगरी प्रा चूडामणि रेग्मीलाई पवित्रादेवी चौलागार्इं मानव अधिकार श्रष्टा सम्मान, प्राडा गुरुप्रसाद सुवेदीलाई चन्द्रकला खनाल अहिंसा श्रष्टा सम्मान, पुरष्कृतहरुका तर्फबाट परिवारका सदस्य तथा प्रतिनिधिले ग्रहण गर्नुभएकोे थियो । पुरस्कृत श्रष्टाहरुले नेपालीका अतिरिक्त नेपाल भाषा (नेवारी), संस्कृत, मैथिली, भोजपुरी, थारु, राई, मगर र गुरुङगरी नौ भाषामा विशेष योगदान गर्नुभएको थियो भने अंग्रेजी भाषामासमेत उहाँहरुका कृति प्रकाशित छन् ।
शान्ति समाजले ०७७ देखि पुरस्कार प्रदानगर्दै आएको समाजका उपनिर्देशक सरिता पौडेलले जानकारी दिनुभएको छ । उहाँकाअनुसार दुर्गालाल श्रेष्ठलाई कृष्णकुमारी दाहाल शान्ति श्रष्टा सम्मान, डा तीर्थबहादुर श्रेष्ठलाई मानबहादुर रावल वातावरण श्रष्टा सम्मान, करुणा झालाई श्रीनारायण दाहाल श्रष्टा सौगात पुरस्कार प्रदान गरिएको छ । स्वास्थ्य अवस्थाका कारण उहाँहरु उपस्थित हुन सक्नुुभएन । समाजका सभापति रेनुका पौडेलको सभापतित्वमा सम्पन्न कार्यक्रममा समाजका संस्थापक सभापति कृष्ण पहाडी, राष्ट्रिय गानका रचनाकार व्याकुल माइला, पूर्वमुख्य न्यायाधीश शेषराज शिवाकोटी, कवि अर्जुन पराजुली, शान्ति समाजका पूर्वसभापतिहरु होमकान्त चौलागाईं र रामकृष्ण बराल, संस्थापक सदस्य कृष्ण कँडेल, सल्लाहकार रामप्रसाद जोशी, सचिव दिल्ली जैसी, सचिव दिवाकर पुडासैनी, सचिव प्रेम पटेल, सचिव तुुलसीराम सुनार, कोषाध्यक्ष चन्द्रमणि बञ्जारा, पूर्वकोषाध्यक्ष किरण ढकाल र श्रष्टा रामबाबु दाहालको उपस्थिति रहेको थियो ।
कार्यक्रममा उपसभापतिहरु लक्ष्मीनारायण मिश्र र धन थापा, पूर्ववरिष्ठ उपसभापति तथा अनुशासन समितिका संयोजक कृष्णबहादुर रावलले मन्तव्य व्यक्त गर्नुभएको थियो भने कार्यक्रम सञ्चालन महासचिव प्रकाश शाहीले गर्नुभएको थियो । कार्यक्रममा पुरस्कृत श्रष्टाहरुले आफ्नो रचना वाचन गर्नुभएको थियो । रासस
