काठमाडौं,१६ चैत । कतिपय सरकारी कर्मचारीले चार महिनादेखि तलब नपाएको गुनासो सुनिएको छ । प्राप्त समाचारअनुसार सिरहाको लहान नगरपालिकामा कार्यरत कर्मचारी र शिक्षकहरुको विगत चार महिनादेखि तलब रोकिएको छ । तलब नपाउँदा उनीहरुको दैनिकी चलाउनै समस्या भएको गुनासोगर्न थालेका छन् । सामान्य प्रशासन मन्त्रालयले नगरपालिकाका सम्पूर्ण खाता रोक्का गरिदिएपछि यो समस्या भएको हो । एक बिद्यालयका प्रधानाध्यापक नारायणप्रसाद साहले मंसिरदेखि तलब भत्ता मात्र होइन, पाठ्यपुस्तक, छात्रवृत्ति, दिवा खाजा र बिद्यालय व्यवस्थापन अनुदान रोकिएको छ । तलब नपाउँदा जीविका धान्न, बैंकको ऋणको ब्याज तिर्न समस्या भइरहेको छ भन्नुभयो । नगरप्रमुख महेशप्रसाद चौधरीले खाता रोक्का हुनुको मुख्य कारण प्रमुख प्रशासकीय अधिकृतको सरुवा विवाद र राजनीतिक पूर्वाग्रह भएको बताउनुभयो ।
उहाँले यहाँका खाता रोक्का राख्नुपर्ने कुनै कारण छैन तर राजनीतिक पूर्वाग्रह र दबाबले विवाद खडा गराइएको छ । मन्त्रालयले चुनावपछि खाता खोलिदिने आश्वासन दिए पनि हालसम्म सुनुवाइ भएको छैन भन्नुभयो । उहाँले मन्त्रालयले चाँडै यो समस्या समाधान गरी विकास निर्माणलगायतका काम अगाडि बढाउन आग्रह गर्नुभयो । मन्त्रालयले साविकका प्रमुख प्रशासकीय अधिकृत जयकान्त झालाई सरुवा गरी शिक्षातर्फको उपसचिव खिम भुजेललाई पठाउन खोजेको थियो । नगरपालिकाले भने प्रशासनतर्फको अनुभवी उपसचिव माग गरेको थियो । अर्कोतर्फ, अवकाश हुन छमहिना मात्र बाँकी रहेकाले सरुवा रोक्न मागगर्दै झाले प्रशासकीय अदालतमा मुद्दा दर्ता गर्नुभएको थियो ।
अदालतले गत फागुन ११ गते सरुवालाई यथास्थितिमा राख्न आदेश दिएपनि मन्त्रालयले हालसम्म नगरपालिकाको खाता फुकुवा गरेको छैन । कर्मचारीहरुले इलाका प्रशासन कार्यालयमार्फत प्रधानमन्त्री कार्यालय र मन्त्रालयमा ज्ञापनपत्र बुझाउँदै नयाँ वर्ष ०८३ र सिरुवा पर्वअघिनै तलब भुक्तानी नभए सशक्त आन्दोलनगर्ने चेतावनी दिएका छन् ।
