काठमाडौं,१७ चैत । राष्ट्रपति रामचन्द्र पौडेलले संसद्को दुवै सदनको अधिवेशन आह्वान गर्नुभएको छ । उहाँले नेपालको संविधानको धारा ९३ को उपधारा (१) बमोजिम नेपाल सरकार, मन्त्रिपरिषद् बैठकको सिफारिसअनुसा यही चैत १९ गते बिहीबार दिउँसो २ः०० बजे अधिवेशन आह्वान गर्नुभएको राष्ट्रपतिको कार्यालयका प्रवक्ता रितेशकुमार शाक्यले जानकारी दिनुभयो । यसअघि, आजै बसेको मन्त्रिपरिषद् बैठकले अधिवेशन आह्वानका लागि राष्ट्रपतिसमक्ष सिफारिसगर्ने निर्णय गरेको थियो ।
यसैबीच,संघीय संसद सचिवालयले राष्ट्रपतिको आह्वानअनुसार दुवै सदनका सदस्यहरुलाई बैठकमा उपस्थितिका लागि अनुरोध गरेको छ । महासचिव पद्मप्रसाद पाण्डेयद्वारा जारी सूचनामा सबै सांसदहरुलाई सिंहदरबारस्थित निर्माणाधीन संसद भवनको सभाकक्षमा उपस्थितका लागि अनुरोध गरिएको छ ।
