काठमाडौं,९ वैशाख । नेपाल कम्युनिष्ट पार्टीको ७७ औं स्थापना दिवस र १५६ औं लेनिनको जन्म दिवसका उपलक्षमा क्रान्तिकारी कम्युनिष्ट पार्टी नेपालका प्रबक्ता हेमन्त प्रकाश वलीले एक बक्तब्य प्रकाशित गरी क्रान्तिप्रतिको प्रतिबद्धता जनाउनुभएको छ । उहाँले बक्तब्यमा भन्नुभएको छ–आजभन्दा १५६ वर्ष पहिले २२ अप्रिलका दिन विश्व सर्वहारावर्ग तथा उत्पीडित जनताको मुक्तिका मार्गनिर्देशक लेनिनको जन्म भएको थियो । त्यही जन्मदिन पारेर आज भन्दा ७७ वर्ष पहिले पुष्पलाल र उहाँका सहयोद्धाहरुले नेपाल कम्युनिष्ट पार्टीको स्थापना गरेका थिए । त्यसकारण हामी यस दिनलाई विशेष रुपमा स्मरण गर्न चाहन्छौं ।
लेनिनलाई सम्झनुको अर्थ साम्राज्यवाद भनेको युद्ध हो भन्ने लेनिनवादी मान्यतालाई आत्मसातगर्नु र साम्राज्यवादी युद्धलाई क्रान्तिमा बदल्ने प्रतिबद्धता जाहेरगर्नु हो । तेस्रो विश्वयुद्ध तर्फ उन्मुखहुँदै गएको आजको मध्यूर्वको भयावह स्थितिले लेनिनवादको सान्दर्भिकतालाई पुनः पुष्टि गरेको छ । त्यसै गरी पार्टी स्थापना दिवस मनाउनुको अर्थ किन ७७ वर्षसम्म नेपालमा क्रान्ति सम्पन्न हुन सकेन ? भनेर आफैमाथि प्रश्न उठाउने र इतिहासको ठोस विश्लेषण सहित नयाँ जनवादी क्रान्तिको खुडकिलो पारगरी वैज्ञानिक समाजवादमा अघि बढ्ने प्रतिबद्धता जाहेरगर्नु हो । नेपाली समाजको विकास प्रक्रियामा आज नवउपनिवेशवाद बाधक बनेर आएको छ ।
बक्तब्यको अन्त्यमा यो अवस्थाबाट मुक्तिका निमित्त नेपालमा नयाँ जनवादी क्रान्तिलाई अगाडि बढाउन सच्चा कम्युनिष्टहरुका बीचमा सिद्धान्तनिष्ठ एकता र देशभक्त, क्रान्तिकारी जनवादी, वामपन्थी तथा कम्युनिष्ट लगायत सबै साम्राज्यवाद विरोधी शक्तिलाई संयुक्त मोर्चा निर्माणका लागि आह्वानगर्दै हामी त्यसको व्यावहारिक पहललाई अघि बढाउने प्रतिबद्धता व्यक्त गर्दछौं भनिएको छ ।
