काठमाडौं,१५ जेठ । नेपाली चलचित्रलाई चीनको बजारसँग जोड्ने उद्देश्यले आयोजित नेपाल एभरेष्ट फिल्म फेष्टिभल’ले दुई देशबीचको सांस्कृतिक सम्बन्धलाई नयाँ उचाइमा पु¥याउने अपेक्षा गरिएको छ । चलचित्रकर्मीले उक्त फेष्टिभललाई नेपाली चलचित्र उद्योगका लागि अन्तरराष्ट्रिय बजार विस्तारको महत्वपूर्ण शुरुआतका रुपमा व्याख्या गरेका छन् । फेष्टिभलको अनुभव सार्वजनिक गर्न आयोजित कार्यक्रममा नेपाल एआई फिल्म एलायन्स् तथा एभरेष्ट फिल्म फेष्टिभलका अध्यक्ष करुण थापाले करिब तीन वर्षअघि चिनियाँ नागरिक ली होङ्गशु (शु–ग) ले नेपाली चलचित्रलाई चीनको बजारमा लैजाने प्रस्ताव राखेपछि यस अभियानको शुरुआत भएको जानकारी दिनुभयो । फेष्टिभलका लागि नेपालबाट २३ चलचित्र पठाइएकामा ११ वटा छनोटमा परेका जनाउँदै उहाँले अन्तत छवटा चलचित्रले चिनियाँ सेन्सर प्रक्रिया पार गरेका बताउनुभयो ।
उहाँका अनुसार सेन्सर पास भई छनोट भएका चलचित्रमा ‘एन्जिला’, ‘छक्का पन्जा–५’, ‘तेलभिसा’, ‘महाजात्रा’, ‘कबड्डी–४’ र ‘होस्टेल’ छन् । फेष्टिभलमा चलचित्र विकास बोर्डका अध्यक्ष दिनेश डिसी, निर्देशक समाजका तत्कालीन अध्यक्ष जनकदीप पराजुलीलगायत निर्देशक, निर्माता र कलाकारहरुको सहभागिता थियो । साथै सशस्त्र प्रहरी बलका कलाकार टोलीले नेपाली सांस्कृतिक नृत्य प्रस्तुत गरेका थिए । कार्यक्रममा चीनको छाङ्शामा सात दिनसम्म ‘कबड्डी–४’, ‘छक्का पञ्जा–५’, ‘महाजात्रा’, ‘एन्जिला’, ‘तेलभिसा’ र ‘होष्टेल–३’ प्रदर्शन गरिएको थियो । एउटै समयमा पाँच वटा हलमा नेपाली चलचित्र प्रदर्शन भएको अनुभव नेपाली टोलीका लागि अविस्मरणीय रहेको सहभागीहरुले बताएका छन् । फेष्टिभल अवधिमा आयोजित ‘एआई फिल्म मेकिङ कन्फरेन्स’ लाई पनि महत्वपूर्ण उपलब्धिकारुपमा लिइएको छ । चीन एआई प्रविधिमा अग्रस्थानमा रहेको उल्लेखगर्दै नेपाली टोलीले चलचित्र निर्माणमा कृत्रिम बुद्धिमत्ताको प्रयोगसम्बन्धी प्राविधिक ज्ञान आदान–प्रदानगर्ने अवसर प्रदानगरेको फिल्म फेष्टिभलका अध्यक्ष थापाले बताउनुभयो ।
उहाँले हालै चीनको हुनान प्रान्तका छाङ्शा र हेङ्याङ सहरमा सम्पन्न ‘२०२६ नेपाल एभरेष्ट फिल्म फेष्टिभल’ ले नेपाली चलचित्र उद्योगका लागि अन्तरराष्ट्रिय बजार विस्तारको नयाँ सम्भावना सिर्जना गरेको जानकारी दिनुभयो ।अध्यक्ष थापाका अनुसार करिब तीन वर्षअघि चिनियाँ नागरिक होङ्गशुले नेपाली चलचित्रलाई चीनको विशाल बजारमा लैजाने प्रस्ताव राखेपछि यो अभियान शुरुभएको हो । प्रारम्भमा सामान्य भेटघाटबाट शुरुभएको प्रयास अहिले नेपाल–चीन चलचित्र सहकार्यको महत्वपूर्ण आधार बनेको उहाँले बताउनुभयो । समारोहमा चिनियाँ अध्यक्ष जियाङ बोले सन् २०२१ को प्रारम्भिक परिकल्पनादेखि लिएर दुई वर्षभन्दा बढीको अथक तयारीपछि यो महोत्सवले पूर्णता पाएको स्मरण गर्नुभयो । कार्यक्रममा नेपाल चलचित्र विकास बोर्डका अध्यक्ष दिनेशराज दाहालसहित नेपाली चलचित्रकर्मीहरुको सहभागिता थियो । रासस
