काठमाडौं,१५ जेठ । आज संसद सचिवालयले आगामी आर्थिक वर्ष ०८३÷८४ को राजस्व र व्ययको वार्षिक अनुमान (बजेट) पेश हुने संयुक्त बैठकको तयारी पूरा गरेको जनाएको छ । सिंहदरबारस्थित नयाँ र निर्माणाधीन संसद भवनमा हाल प्रतिनिधिसभाको बैठक सञ्चालन भइरहेको बहुउद्देश्यीय हलमा आज शुक्रबार अपरान्ह चार बजे संयुक्त बैठक राखिएको छ । सोही बैठकमा प्रतिनिधिसभा निर्वाचनपछिको नयाँ सरकारका अर्थमन्त्री डा स्वर्णिम वाग्लेले बजेट पेश गर्नुहुनेछ ।
प्रतिनिधिसभा र राष्ट्रियसभाका सदस्यहरुलाई सो समय अगावै स्थान ग्रहणगर्न सूचित गरिएको छ । संसद् सचिवालयका प्रवक्ता एकराम गिरीले नयाँ भवनको प्रतिनिधिसभा कक्षमा संयुक्त बैठक चलाउने तयारी भए पनि हालसम्म ‘फिनिसिङ’ कार्य पूरा नभएकाले बहुउद्देश्यीय हलबाटै बजेट प्रस्तुती हुन लागेको बताउनुभयो । उहाँले स्थानाभावका कारण बजेट प्रस्तुती हुने संयुक्त बैठकमा संवैधानिक निकायका पदाधिकारी, नेपाल सरकारका उच्चाधिकारी र नेपालस्थित कूटनीतिक नियोगका प्रमुख एवं प्रतिनिधिहरुलाई आमन्त्रण नगरिएको बताउनुभएको छ ।
